- ឈ្មោះ(អង់គ្លេស)
- Thorn Leakhena
- ឈ្មោះក្រៅ
- ភេទ
- ស្រី
- ថ្ងៃកំណើត
- December 22, 1989
- ទីកន្លែងកំណើត
- កោះកុង
- កំពស់
- ១.៦៥ម
ជីវប្រវត្តិសង្ខេប
នាងជាពិធីការិនីនៅស្ថានីយទូរទស្សន៍ CTN ។
ពិធីការិនីសម្តីរប៉ិលរប៉ូចប្រចាំស្ថានីយទូរទស្សន៍ CTN ក្នុងកម្មវិធី "សុខគា លក្ខិណា BIG” កញ្ញា ថន លក្ខិណា បានហក់ចូលក្នុងវិស័យសិល្បៈក្នុងរយៈពេលជិត ២ឆ្នាំតែប៉ុណ្ណោះ ប៉ុន្តែនាងទទួលបានប្រជាប្រិយភាព និងការគាំទ្រស្ទើរតែនឹកស្មានមិនដល់ ហើយក៏មិនដែលនឹងពើបប្រទះនូវរឿងអាស្រូវប៉ះពាល់ដល់កិត្តិយសរបស់ នាងធ្ងន់ធ្ងរ ឬបាត់ប្រជាប្រិយភាពនោះឡើយ។
ប៉ុន្តែនៅក្នុងអំឡុងពេលដែលកម្រិតជីវភាពរបស់ លក្ខិណា មានសភាពប្រែប្រួលខុសពីធម្មតា មានរថយន្តថ្មីសន្លាងជិះយ៉ាងសង្ហា និងប្រកបទៅដោយស្ទិលស៊ីវិល័យហ៊ឺហាទៀតនោះ ធ្វើឲ្យទស្សនិកជនដែលស្គាល់ លក្ខិណា ច្បាស់មានមន្ទិលសង្ស័យទៅលើភាពមិនប្រក្រតីនេះ។
ប្រភពព័ត៌មាននៅក្នុងចង្កោមអ្នកសិល្បៈដូចគ្នាបានព្រលយឲ្យ "ធម្មជាតិ” ដឹងថា បច្ចុប្បន្ន ថន លក្ខិណា មានបុរសអ្នកមានម្នាក់ ដែលជាក្លឹបកម្សាន្តដ៏ល្បីនៅទីក្រុងភ្នំពេញ ជាអ្នកជួយឧបត្ថម្ភ និងចិញ្ចឹមរយៈពេលជិតមួយឆ្នាំមកហើយ។
ទោះបីជាយ៉ាងណា ការជួយឧបត្ថម្ភនេះ គឺបានជួយលើកកម្ពស់កម្រិតជីវភាពរបស់ លក្ខិណា និងអាជីពរបស់នាងកាន់តែខ្ពស់ទៅៗរហូតបានក្លាយជាពិធីការិនីក្នុង ស្ថានីយទូរទស្សន៍ CTN ទៀតផង។ មិនតែប៉ុណ្ណោះ បុរសម្នាក់នោះ បានយក ថន លក្ខិណា ធ្វើជាស្រីកំណាន់ចិត្តផងដែរ។ ជាការពិតណាស់ គ្រាន់តែជាព័ត៌មាន និងពាក្យចចាមអារ៉ាមនោះឮដល់ ថន លក្ខិណា ភ្លាម នាងហាក់ដូចជាក្តៅស្លឹកត្រចៀក និងមានអារម្មណ៍ក្ដុកក្ដួលជាពន់ពេក។
ថន លក្ខិណា និយាយថា ព័ត៌មានកន្លងមកសុទ្ធតែមិនមែនជាការពិតទាំងអស់ ខ្ញុំសូមបដិសេធន៍។ រឿងឡាន និងភាពមានបានរបស់ខ្ញុំកន្លងមក គឺសុទ្ធតែជាញើសឈាមរបស់ខ្ញុំ និងក្រុមគ្រួសាររបស់ខ្ញុំទាំងអស់។ ខ្ញុំមានសាក្សីបញ្ជាក់ការពិត ដើម្បីកុំឲ្យទស្សនិកជនមានការយល់ច្រឡំ។
ចំណែកឡានមួយគ្រឿង ដែលមានអ្នកយល់ច្រឡំថា ជាកាដូរបស់ម្នាក់ណានោះ គឺមិនពិតប្រាកដឡើយ។ រថយន្តដែលខ្ញុំជិះរាល់ថ្ងៃនេះ គឺទិញតាំងពីឆ្នាំ២០០៨ ក្នុងតម្លៃ ២៤៨០០ដុល្លារអាមេរិក ម៉ាកកាមរីស៊េរីឆ្នាំ២០០២ និងដាក់ឈ្មោះបងប្រុសរបស់ខ្ញុំ មិនមែនដូចការលើកឡើងខាងលើនេះទេ។
ថន លក្ខិណា បញ្ជាក់ទៀតថា ចំណែកឯផ្ទះល្វែងរបស់ខ្ញុំនៅម្តុំវត្តតាំងក្រសាំង គឺក្រុមគ្រួសាររបស់ខ្ញុំជាអ្នកទិញ ដោយបង់រំលោះរាល់ខែ ហើយមកដល់ពេលនេះ គឺជិតដាច់ និងផុតការបង់រំលោះនេះហើយ។ ថន លក្ខិណា ទទួលស្គាល់ថា តាមការពិតបុរសជាថៅកែក្លឹបដែលទស្សនិកជនយល់ច្រឡំនោះ គាត់គឺជាថៅកែផ្ទះល្វែង ដែលក្រុមគ្រួសាររបស់ខ្ញុំទិញពីគាត់ ដើម្បីរស់នៅសព្វថ្ងៃនេះ ដូច្នេះ ខ្ញុំត្រូវបង់ប្រាក់រំលោះថ្លៃផ្ទះរាល់ខែជូនគាត់វិញ មិនមែនដូចដែលព័ត៌មានចោទថា គាត់ជាអ្នកឧបត្ថម្ភ ឬផ្តល់ជាលាភសក្ការៈឲ្យខ្ញុំនោះឡើយ។ អ្វីដែលខ្ញុំលើកឡើងខាងលើនេះ គឺសុទ្ធតែជាការពិតទាំងអស់ សូមឲ្យទស្សនិកជនកុំបីមានក្តីមន្ទិលសង្ស័យបន្តទៀតទៅ។
គួរបញ្ជាក់ថា ពិធីការិនីដ៏ក្រមិចក្រមើម ថន លក្ខិណា ក្រៅពីមានការងារក្នុងវិស័យសិល្បៈ នាងកំពុងតែសិក្សាថ្នាក់ទី១២ នៃវិទ្យាស្ថានប៊ែលធីអន្តរជាតិ និងត្រៀមប្រឡងបាក់ឌុបក្នុងឆ្នាំក្រោយនេះផងដែរ។ មិនតែប៉ុណ្ណោះ នាងក៏កំពុងហាត់រៀនជំនាញសិល្បៈបន្ថែមដើម្បីកាន់កម្មវិធីថ្មីៗ មួយចំនួនទៀតក្នុងស្ថានីយទូរទស្សន៍ CTN បន្ទាប់ពីកម្មវិធី "សុខគា លក្ខិណា BIG”។ ដោយឡែកកម្មវិធីដែលនាងកំពុងកាន់សព្វថ្ងៃនេះ ក៏កំពុងតែទទួលបាននូវប្រជាប្រិយភាពមិនធម្មតានោះឡើយ៕ ប្រភពដកស្រង់ចេញពី ទស្សនាវដ្ដី "ធម្មជាតិ”